«Rýhanı jańǵyrý» baǵdalamasy sheńberinde shalǵaıdaǵy Andreevka aýylynda Alla Taǵalanyń jerdegi úıi paıdalanýǵa berilip, saltanatty jaǵdaıda ashyldy.
Igilikti sharada sóılegen sózinde oblys ákiminiń birinshi orynbasary Aıdarbek Saparov Táýelsizdik kezeńinde «Mádenı mura», «Halyq–tarıh tolqynynda» baǵdarlamalary boıynsha tarıhı-mádenı eskertkishter men nysandardy jańǵyrtýda, tól tarıhymyzǵa qatysty qujattardy júıeli jınaqtaýda ulan-ǵaıyr ister tyndyrylǵanyn, al «Bolashaqqa baǵdar: rýhanı jańǵyrý» maqalasynda Elbasy búgingideı dúbirli dúnıede sana-sezimimiz ben dúnıetanymymyzǵa ábden sińip qalǵan taptaýryn qaǵıdalardan arylý, ol úshin zamana aǵymyna ıkemdelý,jańa dáýirdiń jaqsy sıpattaryn boıymyzǵa sińirý, jańa turpatty jańǵyrýdyń eń basty kilti–ulttyq kodty saqtaı bilý sekildi keshendi mindetter júktegenin atap ótti. Ortaq qýanyshqa jınalǵan jurtshylyqty aýyl ómirindegi aıtýly oqıǵamen quttyqtady.
«Qyzyljar» meshitiniń bas ımamy Kenjetaı qajy Baıkemeluly Jaratqannyń qoldaýymen iske qosylǵan ǵıbadathana musylman jamaǵatynyń bes namaz paryzyn qaza qylmaıtyn qutty ornyna aınalatynyna senim bildirdi. Meshittiń moldasy Zulqaınar Ergashevtiń qolyna Qazaqstan musylmandary Dinı basqarmasynyń bas múftıi Serikbaı qajy Orazdyń qoly qoıylyp, móri basylǵan tirkeý qujatyn ustatty.
Arnaıy dinı ázirlikten ótken ımamǵa sharýashylyqtar esebinen baspana turǵyzylyp, jalaqy taǵaıyndalatyn boldy.
Eldi mekenge erekshe kórik beretin bıik munaraly, aı qulaqty meshittiń salynýyna járdem jasaǵan– Bilálovtar áýleti. Oǵan esimi berilgen Sultanǵazy Bilálov marqum eline eleýli, halqyna qalaýly azamat bolǵan. Kishipeıil minezimen, jomart kóńilimen, qolynyń ashyqtyǵymen jurtshylyq iltıpatyna bólengen. Adamǵa degen erekshe qurmet baılyqpen baǵalanbaıtynyn, qyzmetpen ólshenbeıtinin kózi tirisinde dáleldep ketken. Onyń ákesi Bilál «halyq jaýy» retinde atý jazasyna kesilgen. Qazir gazet-kitaptarda jıi basylyp júrgen atalas týysy Maǵjannyń jalǵyz sýretin Sultekeń saqtap qalǵan.
Jańa ashanada as berilip, arýaqtarǵa quran baǵyshtaldy.
О́mir ESQALI, «Egemen Qazaqstan»